I Nkom si kartlegging er Vestland det fylket i landet – dersom ein ser bort frå Oslo – som har best breiband-dekning. Dette heng saman med at fylkeskommunen og fleire kommunar har løyvd ekstra tilskotsmidlar, i tillegg til midlane som er løyvd over statsbudsjettet. Fleire av utbyggjarane har også bidratt med store beløp i spleiselaget. Resultatet er at 98,1 prosent av husstandane har dekning med hastigheit på minst 1 gigabit/s, og 99,4 % av husstandane har dekning med hastigheit på minst 100 megabit/s. Vestland er på god veg til å bli det første fylket som leverer på den nasjonale målsetninga om gigabit til alle innan 2030.
